Таниқли тадбиркор Илон Маск асос солган Neuralink ширкати инсонлар иштирокида тажриба ўтказиш учун кўнгиллиларни ёлламоқда.
АҚШ озиқ-овқат ва фармацевтика агентлиги (FDA) май ойида Neuralink чиплари синовида одамлар иштирокига рухсат берган. Дастурда иштирок этиш учун бутунлай фалаж бўлган кўнгиллилар қидирилмоқда. Миясига чип киритилгандан сўнг улар олти йил батафсил кузатилади ва шундан сўнг технологиянинг самарадорлиги ва хавфсизлиги ҳақида хулоса чиқариш мумкин бўлади. Муваффақиятли бўлса, технология оммавий фойдаланиш учун тасдиқланиши мумкин.
Аввалроқ Neuralink ширкати миясига чип жойлаштирилган чўчқа ва маймун устида муваффақиятли тажрибалар ўтказган эди. Масалан, миясига нейрочип ўрнатилган маймун «онг кучи» билан содда видеоўйин ўйнай олган.
Neuralink ширкати Альцгеймер касаллиги, ақлий заифлик ва умуртқа поғонаси шикастланиши каби неврологик касалликларни даволаш ва инсониятни сунъий ақл билан бирлаштиришга ёрдам берадиган симсиз мия чипларини ишлаб чиқишни мақсад қилган.
Бундай чиплар фалажланган беморларга ўз онгини ишга солиб телефонини бошқариш, ҳатто компьютер ўйинларини ўйнаш имконини беради. Электрон мосламаларни идрок воситасида бармоқ ишлатгандан ҳам тезроқ бошқариш мумкин. Ишбилармон Маск StarCraft фақат онг кучи билан ўйналадиган илк ўйин бўлишига ваъда берган.
Илон Маск, шунингдек, электромобиль ва ракета ишлаб чиқарувчи Tesla ҳамда SpaceX каби илғор технология ширкатларига ҳам асос солган. Хусусан, SpaceX қайта фойдаланиш мумкин бўлган ракета ясаган дунёдаги илк ширкатдир.
